Wednesday, 30 August 2017

வார்த்தைகளும், வடுக்களும்...



பணச் சிக்கனம், பொருள் சிக்கனம் தெரியும். வார்த்தைச் சிக்கனம் தெரியுமா? குடும்ப பிரச்சனைகளுக்கு இடையேயான விரிசல்கள் பெரிதாகாமல் இருக்க வேண்டுமானால் உங்களிடம் எப்பொழுதும் வார்த்தைச் சிக்கனம் என்ற வயாகரா இருந்து கொண்டேயிருக்க வேண்டும். 

எந்த மனைவியாது, “தொண, தொணன்னு பேசி நச்சரிக்காதீங்க”, “பேசிப் பேசியே கழுத்தை அறுக்காதீங்க” என கணவனைச் சொன்னதாக கேள்விப்பட்டிருக்கிறீர்களா? பல வீடுகளில் மனைவி கணவனின் காதோடு காது வைத்து ”கல்லுளிமங்கா”, “வாழைப்பழ சோம்பேறி”, “அழுத்தக்காரா”, “ஊமைக்கொட்டான்” எனச் செல்லமாக உசுப்பேற்றி, உசுப்பேற்றியே பேச வைக்கின்றனர். ஆனால், பெண்கள் அப்படி இல்லை. கணவனுக்கும், மனைவிக்கும் சேர்த்து பேச வேண்டும் எனச் சொன்னால் கூட அசராமல் பேசுவார்கள். ஒரு ஜோக். ஒரு பையன், “என்ன தலைப்பு கொடுத்தாலும் அதைப்பற்றி ஒரு மணிநேரம் எங்க அம்மாவால் பேச முடியும்” என்றான் பெருமையாக. உடனே அவனின் நண்பன், “இது என்ன பிரமாதம். எந்த தலைப்பும் இல்லாமலே ஒருநாள் முழுக்க கூட என் அம்மாவால் பேசமுடியும். உனக்கு சந்தேகம்னா எங்க அப்பாவைக் கேட்டுப் பாரேன்” என்றான். பேசுவதற்காகவே பிறந்தவர்கள் பெண்கள். அது அவர்களின் குணம். 

வார்த்தைகளை கட்டுப்படுத்தத் தெரியாமல் அள்ளி வீசும்போது அது குடும்பத்தின் கட்டமைப்பை ஆட்டிப் பார்த்து விடுகிறது. “ஒரு வார்த்தை வெல்லும்; ஒரு வார்த்தை கொல்லும்” என்றும், “நா காக்க வேண்டும்” என்றும் முன்னோர்கள் அறிவுறுத்திச் சொன்னதெல்லாம் படிப்பினை. முன்னோர்களையே மதிக்கப் பழகாத நாம் அவர்களின் அறிவுரைகளையா மதிக்கப் போகின்றோம்? அதன் விளைவு இன்று குடும்ப உறவுகளிலும், கணவன், மனைவி உறவிலும் விரிசல்கள் பாலம், பாலமாக விழ ஆரம்பித்து விட்டன.

வெறும் வார்த்தைகள் என நாம் நினைத்துச் சொல்பவைகள் பின்னர் உண்மையாகிப் போவதற்கு நிறைய சாத்தியங்கள் இருப்பதாக மனவியலறிஞர்கள் கூறுகின்றனர். இது உண்மை என்பதற்கு ஒரு நிகழ்வு. இராமாயானத்தில் சீதை தன் கற்பை நிரூபிக்க தீ குளிப்பாள். இதற்குக் கம்பரும், வால்மிகியும் சொன்ன காரணத்தை விடுங்கள். நம்ம சுகி. சிவம் அவர்கள் ஒரு அருமையான காரணம் சொல்லியிருக்கிறார். சீதை இராம, இலட்சுமணரோடு காட்டில் தங்கியிருந்த போது அங்கே வந்து நின்ற மாயமானைப் பிடித்து தரச் சொல்லி இராமரிடம் கேட்கின்றாள். இலட்சுமணனை குடிலுக்கு காவலாய் நிறுத்தி விட்டு மானை இராமன் விரட்டிச் செல்கிறான். அவர் அம்புக்கு அடிபட்ட மான், “ஹே….இலட்சுமனா, ஹே……சீதா” என கத்தி விட்டுச் சாய அண்ணனுக்கு ஆபத்து உடனே சென்று காப்பற்று என இலட்சுமணனை சீதை போகச் சொல்கிறாள். அண்ணனுக்காவது ஆபத்து வருவதாவது எனச் சொல்லி குடிலின் காவலுக்கு இருந்த இலட்சுமணன் போக மறுக்கின்றான். உடனே சீதை, “நீ உடனே செல்லாவிட்டால் இங்கேயே நான் தீ குளித்து விடுவேன்” என்று சொல்கின்றாள். இதைக் கேட்டதும் தன் அண்ணன் இராமனைத் தேடி இலட்சுமணன் செல்ல இராவணன் சீதையை இலங்கைக்கு சிறையெடுத்துச் சென்றான். அதன்பின் ஆண்டுகள் பல கடந்தும் சீதை சொன்ன சொல் ஓரிடத்தில் உண்மையானது. அன்று கணவனுக்காக தீ குளிப்பேன் எனச் சொன்னதாலயே அதே கணவனுக்காக தீ குளிக்க வேண்டி வந்தது என்கிறார். சொல்லின் வலிமைக்குச் சொல் வேந்தர் சொன்ன காரணம் பொருத்தம் தானே! இன்று பெற்ற பிள்ளைகளை சனியனே, மூதேவி, தரித்திரம், தெண்டம், உதவாக்கரை என பெற்றோர்கள் சர்வ சாதாரணமாக தினம், தினம் திட்டிக் கொண்டேயிருக்கிறார்கள். இவர்கள் இதையெல்லாம் யோசித்துத் திருந்தினால் அவர்களுக்கு எப்படியோ அவர்களுடைய பிள்ளைகளின் எதிர்காலத்திற்கு நல்லது.

வார்த்தைகளின் மூலம் ஏற்படுகின்ற வடு காலம் காலமாக மனதிற்குள்ளேயே இறுகி வஞ்சம் தீர்ப்பதற்கான வாய்ப்புகளைத் தேடிக் கொண்டேயிருக்கிறது. அதனாலயே தீயினால் சுட்ட புண்ணை விட நாவினால் சுட்ட புண்ணை ஒருபடி மேலே வைத்து வள்ளுவத் தாத்தா எச்சரித்துப் போனார். தன் மீது வீசப்பட்ட வார்த்தைகளுக்கு வஞ்சம் தீர்ப்பதற்கான வாய்ப்புகளை குடும்பத்திற்குள் ஆண்களை விட பெண்களே அதிகம் தேடுகின்றனர். வாய்ப்புகள் தேடும் வேலைவாய்ப்பு அலுவலகமாக வீட்டை மாற்றிக் கொண்டு அதற்காகவே காத்திருக்கின்றனர். மாமியார், மருமகள் பிரச்சனை இதற்கு நல்ல உதாரணம்.

பல மாமியார்கள் தாங்கள் மருமகளாக வந்த போது தன் மாமியாரால் தனக்கு ஏற்பட்ட விரும்பத்தகாத நிகழ்வுகளுக்கும், தன்னுடைய மாமியார், நாத்தனாரிடம் கேட்ட விரும்பத்தாகாத வார்த்தைகளுக்கும் வஞ்சம் தீர்க்க தனக்கு மருமகளாக வந்த பெண்ணைப் பயன்படுத்த ஆரம்பிக்கிறார்கள். இது தான் பெரும்பாலான வீடுகளில் மாமியார், மருமகள் பிரச்சனைகளுக்கு அடிநாதம். ஆணிவேர். மாமியார் தன் மீது காட்டும் கோபத்தை, கொட்டும் வார்த்தைகளைப் போல இன்னும் ஒரு மடங்கு சேர்த்து மாமியார் மீது அப்படியே திருப்பி அடிப்பதில் சில மருமகள்கள் கில்லாடி. இப்படிப்பட்ட மாமியாரும், மருமகளும் இருக்கும் வீட்டில் “கில்லி” விளையாட்டு அவர்களுக்கிடையே மட்டும் நடைபெறும். இப்படிக் கில்லாடியாக மாமியாரிடம் இருக்க முடியாத மருமகளோ அவருடைய மகன் அதாவது தன் கணவன் மீது மனைவி என்கின்ற ஆளுமையைப் பயன்படுத்தி அதன் மூலம் மாமியாரை வஞ்சம் தீர்க்கப் பார்க்கிறாள். இந்த மாதிரியான குணம் கொண்ட மருமகள்களே இன்று அதிகம். அநேகம். அதனால் தான் மாமியார், மருமகள் பிரச்சனையில் பல வீடுகளில் கணவன் தலை பந்தாடப்படுகிறது!

மாமியார் – மருமகள், கணவன் - மனைவி உறவில் உராய்வுகள் இல்லாமலிருக்க வேண்டுமனால் பிரச்சனைகள் வரும் போது சம்பந்தப்பட்ட இருவரில் ஒருவர் மெளனமாக இருந்து விட வேண்டும். பேச்சு என்கின்ற பலத்தை பலவீனப்படித்தக் கூடிய ஆயுதம் ”மெளனம்”. அதேபோல மனிதர்களைப் பலவீனப்படுத்தக்கூடிய அயுதம் காதல் (LOVE). காதலுக்கும், மெளனத்திற்கும் நெருங்கிய தொடர்பு உண்டு. ஒன்றின் வழி மற்றொன்று தன்னை வெளிப்படுத்திக் கொள்ளக்கூடியது. “ஒரு சொல் சில மெளனங்கள் பேசாமல் பேசிக் கொண்டால் காதல் என்ற வரியை அனுபவித்தவனின் மொழியாகவே எடுத்துக் கொள்ளாலாம். காதலின் கண, கணப்பைக் கணவன், மனைவிக்கிடையே நேசமாய், மாமியார், மருமகளுக்கிடையே பாசமாய் தரக்கூடிய வலிமை மெளனத்திற்கு உண்டு! 

சிலநேரம் மனைவியின் மெளனம் அவள் மீது கணவனுக்குக் காதலாகவும், சிலநேரம் கணவனின் மெளனம் அவன் மீது மனைவிக்குக் காதலாகவும் மாறுவதால் தான் ஒரே ஆணோடு பெண்ணாலும், ஒரே பெண்ணோடு ஆணாலும் குடும்பம் நடத்த முடிகிறது. இந்த ஈர்ப்பின் ஈரம் குறையாதவரை குடும்பத்திலும் சந்தோசத்திற்குக் குறைவிருக்காது.

நன்றி : பாவையர் மலர்

Friday, 28 July 2017

மாற்றம் – முன்னேற்றம் - வெற்றி



பிரபஞ்சத்தின் கோடான கோடி உயிர்களில் நீங்களும் ஒருவர்.  நீங்கள் எப்படிப்பட்டவராக இருக்க வேண்டும்? என்பதை நீங்கள் தான் தீர்மானம் செய்ய முடியும். மற்றவர்கள் வேண்டுமானால் வழிகாட்டலாம். ஆலோசனை தரலாம். ஆனால் மாற்றிக் கொள்வதும், மாறுவதும் உங்கள் கைகளில் தான் இருக்கிறது. அரசியல் முழக்கம் போல ”மாற்றம் – முன்னேற்றம் – வெற்றி“ என்பதை உங்களுக்கு நீங்களே சொல்லிக் கொள்ளுங்கள். அது உங்களை மட்டுமல்ல உங்களின் இலக்கினை நோக்கியும் முன்னேற வைக்கும்.

எத்தனை திறனுள்ள கப்பலாக இருந்தாலும் அதில் ஏற்படும் சிறு ஓட்டை கப்பலை மூழ்கடித்து விடும். அதேபோல நீங்கள் என்ன தான் திறனுடையவராக இருந்தாலும் சில புற, அகக் காரணிகளால் அதுவரையிலும் உங்களுக்குப் பழக்கபட்டிருக்கும் விசயங்களிலிருந்து வெளிவந்து அதில் தேவையான மாற்றங்களைச் செய்து கொள்ளும் போது உங்களின் செயல்பாட்டிற்கான ஊக்கம் இரு மடங்காகும். பத்தோடு பதினொன்று என்றில்லாமல் பத்தில் ஒன்றாய் இருக்க வேண்டுமானால் கீழ் உள்ள விசயங்களில் கவனம் செலுத்துவது அவசியம். அத்தியாவசியம்.

1.முன் மாதிரியாக இருங்கள்:-

பொதுவாக வேலையிடங்களில் தலை எப்படியோ அப்படித் தான் வாலும் என்றும் அரசியல் களங்களில் தலைவன் எப்படியோ அப்படித் தான் தொண்டனும் என்று சொல்வார்கள். இதன் உள்ளாந்த பொருள் தலைமைத்துவத்தில் இருப்பவன் முன் மாதிரியாக இருக்க வேண்டும். நான் தலைமைத்துவத்தில் இல்லையே! பின் எதற்கு நான் இப்படி இருக்க வேண்டும்? என்று நீங்கள் கேட்டால் தவறில்லை. ஆனால், இந்த மாற்றம் உங்களை அந்த நிலைக்கு எடுத்துச் செல்லும். இந்த விசயத்தில் தான் முன் மாதிரியாக இருக்க வேண்டும் என்பதில்லை, மிகச் சாதாரண விசயங்களில் கூட இருக்கலாம். பிரபலமான ஒருவரின் இல்லத் திருமணம், தலைவாழை இலை போட்டு அறுசுவை உணவோடு நடந்த விருந்தின் முதல் பந்தி முடிந்தது. அடுத்த பந்தியில் அமர மற்றவர்கள் காத்திருக்கிறார்கள். சாப்பிட்ட இலைகளை எடுப்பதற்கு ஆட்களை நியமிக்க மறந்து போனதால் சாப்பிட்ட இலைகள் பந்தியிலேயே இருந்தது. எடுக்கச் சொல்லி ஆளாளுக்குச் சொன்னார்களேயொழிய காரியம் ஆகவில்லை. இதைக் கவனித்த ஒருவர் தான் சாப்பிட்டு முடித்த இலையைத் தானே எடுத்துக் கொண்டு போய் அதற்குரிய இடத்தில் போடுகிறார். அவரைப் பார்த்த மற்றவர்களும் அவ்வாறே செய்ய அடுத்த பந்திக்கு இடம் தயாரானது. அப்படிச் செய்தவர் ஜெமினி ஸ்டுடியோ அதிபராக இருந்த எஸ்.எஸ். வாசன். அந்த திருமண வைபவம் ஏ.வி. மெய்யப்ப செட்டியார் வீட்டு திருமணம். முன் மாதிரி மனிதர்கள் மற்றவர்களுக்கு வழிகாட்டியாகவே இருக்கிறார்கள் என்பதற்கு இதை விட என்ன உதாரணம் வேண்டும்? 

2.தீர்மானிப்பவராக இருங்கள்:-

சரியோ, தவறோ நீங்கள் சார்ந்த விசயங்களில் தீர்மானிக்கும் நபராக நீங்களே இருங்கள். மற்றவர்களிடமிருந்து ஆலோசனை, அறிவுரைகளைப் பெறும் அதே நேரம் முடிவுகள் உங்களைச் சார்ந்ததாக இருக்க வேண்டும். அப்பொழுது தான் தவறுகளுக்கு நீங்கள் பொறுப்பேற்கவும் அதைத் திருத்திக் கொள்ளவும் முடியும்,. இல்லையென்றால் திருத்திக் கொள்ள வேண்டிய தவறுகள்  குற்றச்சாட்டுகளாக திசை மாறிவிடும். குற்றச்சாட்டுகள் பெரும்பாலும் இன்னொரு பிரச்சனைக்கான வசலாக இருக்குமேயொழிய தீர்வுகளுக்கான வாசல்களாக அமைவதில்லை. அதனால் தீர்மானிப்பவராக இருப்பதன் வழி தீர்வுகளைத் தேடுபவராகவும் உங்களை அடையாளப்படுத்திக் கொள்ளுங்கள்

3.விலகி ஓடாதீர்கள்:-

பிரச்சனைகளைக் கண்டு விலகி நிற்காதீர்கள். தட்டிக் கழிக்கும் போக்குக் கொண்டவராக இருப்பதன் மூலமாக உங்களுக்கு நீங்களே சுய மதிப்பற்றவராக மாறி விடுவீர்கள். அது  மற்றவர்களின் முன் உங்களை நம்பிக்கையற்றவராகவே அடையாளப் படுத்தும். துணிந்து முடிவெடுப்பவர். அவரை நம்பிச் செய்யலாம். பிரச்சனைகளைச் சமாளிக்கும் சாதுர்யம் கொண்டவர் என்பது போன்ற அடையாளங்கள் எப்பொழுதும் உங்களை ஒரு வெற்றியாளராக காட்டிக் கொண்டே இருக்கும். உங்களின் இலக்கை முழுமையாக அடையாத நிலையிலும் கூட இப்படியான அடையாளங்கள் உங்களை மற்றவர்களால் வெற்றியாளராகவே பார்க்கச் செய்யும்.

4.பெறுவதை விட அதிகம் கொடுங்கள்:-

மற்றவர்களின் உதவி இன்றி எதுவும் சாத்தியமில்லை. உங்களுக்குச் சாத்தியமாக்கித் தந்தவர்களுக்கு அந்த வெற்றி தந்ததைத் விட இன்னும் ஒரு மடங்கு அதிகம் கொடுங்கள். புதிதாக வேலைக்குச் சேரும் நீங்கள் அதற்கு உங்களைத் தகுதிப் படுத்திக் கொள்ளும் வரை தரப்படும் சம்பளம், இதர சலுகைகள் அங்கு பணி செய்து கொண்டிருப்பவர்களின் உழைப்பில் இருந்து தரப்படுகிறது என்பதை எப்பொழுதும் நினைவில் வைத்திருங்கள். இதைத் தொழில் முறை ஆலோசகர்கள் ”ஊதியத்திற்கு மேல் ஊழியம் செய்யுங்கள்” என்கின்றனர். வேலைக்குச் சேர்ந்த சமயத்தில் வேலையில் காட்டி வந்த அக்கறையை பதவி உயர்வு கிடைத்த பிறகு காட்டாமல் இருப்பவர்கள் நம்மில் பலர் இருக்கத்தானே செய்கிறோம்! ஆனால், வெற்றியாளர்கள் கூடுதலான அக்கறை, அர்ப்பணிப்பு மூலம் இன்னும் உயர்ந்த வெற்றிகளைத் தங்கள் வசப்படுத்திக் கொள்கின்றனர்.

5.விதிகளைப் புறந்தள்ளுங்கள்:-

இப்படித்தான் என்று வரையறுக்கப்பட்ட விதிகளோடு இயங்காதீர்கள். விதிகளை தேவைக்கேற்ப மாற்றிக் கொள்ளும் போது மட்டுமே  இலக்குகளை மிகச் சரியாக உங்களால் சென்றடைய முடியும், போக வேண்டிய இடம் முக்கியம். அதில் மாற்றங்கள் இருக்கக் கூடாது, அனால் பயணிக்க வேண்டிய பாதைகளும், முறைகளும் மாற்றமில்லாமல் இருக்க வேண்டும் என்ற கட்டாயமில்லை. அவைகளை அந்தந்தச் சூழல்களே தீர்மானம் செய்கின்றன. சூழலுக்கேற்பச் செயல்படாத போது வெற்றிக்கான சாத்தியங்கள் குறைந்து போகின்றது. எல்லாம் விதி என்ற மனப்போக்கு கொள்ளாமல் முயற்சித்துப் பார்ப்பதன் மூலம் அவைகளை மீறுபவராக இருங்கள். 

6. பரந்த மனப்பான்மையோடு இருங்கள்:-

எல்லாம் தனக்கே என்ற மனப்போக்கு அற்றவராக இருங்கள். கிடைத்த வெற்றியின் சதவிகிதத்தை எல்லோருக்கும் பொதுவானதாக ஆக்குங்கள், ”என்னால் சாத்தியமானது” என்று சொல்வதற்குப் பதிலாக ”நம்மால் சாத்தியமானது” என்று சொல்லிப் பாருங்கள். அது தரும் பலன் இன்னும் பல வருடங்களுக்கு உங்களை தொடர் வெற்றியாளர் என்ற நிலையிலேயே தாங்கி நிற்கும். உலகப் புகழ்பெற்ற காஃபிக்கடையான ஸ்டார்பக்ஸ் நிறுவனத்தில் ஊதியம் என்பதையும் தாண்டி வேலைக்குச் சேர பலரும் விரும்பக் காரணம் அதன் அதிபர் ஹோவர்ட் ஸ்கல்ஸ் தன் ஊழியர்களிடம் காட்டும் மதிப்பும், அக்கறையுமே என்பது  அவரின் வெற்றிக்கதை நமக்குச் சொல்லும் செய்தி.

மாற்றம் - முன்னேற்றம் என்பதைச் சொன்னால் மட்டும் போதாது. செய்தும் காட்ட வேண்டும். அப்படிக் காட்டினால் நீங்களும் வெற்றியாளராகலாம்.

நன்றி : அச்சாரம் மாத இதழ்

Monday, 24 July 2017

முடியும் என்ற நம்பிக்கை



கேள்வி கேட்பது எளிது. பதில் சொல்வது கஷ்டம் என்பதைப் போல “முடியும்” என்பதை விட “முடியாது” என்று சொல்வது இன்று ஈசியான செயலாகி விட்டது. எல்லோருக்குமானதைத் தனக்கானதாக ஏற்றுக் கொள்ளாதவர்களே வெற்றியாள்ர்களாக மிளிர்கின்றனர் என்ற விதி இங்கும் பொருந்திப் போகிறது. என்னால் முடியாது – இயலாது -  சாத்தியமில்லை -  வாய்பே இல்லை என்பதை எந்த நிலையிலும் வெற்றியாளர்கள் ஏற்றுக் கொள்வதே இல்லை. மாறாக தாங்கள் ஏற்றுக் கொள்ளும் வகையில் முடியும் – இயலும் – சாத்தியம் -  வாய்ப்புண்டு என்று மாற்றி அமைக்கின்றனர்.

எந்த ஒன்றை ஆரம்பிக்கும் போதும் அதை முடியும் என்று சொல்பவர்களை விட முடியாது என்று சொல்லி எதிர்மறை எண்ணங்களை நமக்குள் கடத்த நினைப்பவர்களுக்கு பஞ்சவே இருப்பதில்லை. அதற்காக அவர்கள் உங்கள் முன் வைக்கும் காரணம் மிகச் சரியாகப் பொருந்துவதாய் தெரியும். விட்டு விடலாம் என்ற மனநிலையை உருவாக்கும். அதில் சிக்காமல் தப்புகிறவர்கள் அடுத்த அடியை எடுத்து வைக்கின்றனர். மாறாக, அதற்குள் அகப்பட்டுக் கொள்பவர்கள் தங்களின் இலக்கில் இருந்து பின் வாங்கி விடுகின்றனர். இது போதும் என நிறைவு கொள்கின்றனர். வெற்றியாளர்களாக மாற நினைப்பவர்கள் அப்படி நின்று விடுவதில்லை. அவர்கள் மற்றவர்களை விடத் தன்னை மட்டுமே முழுமையாக நம்புகிறார்கள். அதனால் ஒருவேளை தோல்வி ஏற்பட்டாலும் அதைப் பற்றிக் கவலைப்படாமல் தங்கள் முயற்சிகளைத் தொடர்ந்து கொண்டே இருக்கிறார்கள். காரணம் சொல்பவர்கள் காரியங்களைச் செய்வதில்லை. காரியம் செய்ய முனைந்தவர்கள் காரணங்களுக்காகப் பின் வாங்குவதில்லை. அதற்காக தங்களின் நேரம் முழுமையையும் கொடுத்துப் பாடுபடுகின்றனர்.

நமக்கு மட்டுமல்ல இன்று உலகம் கொண்டாடும் எல்லா வெற்றியாளர்களுக்கும் இந்த நிலை இருந்திருக்கவே செய்கிறது. தாமஸ் ஆல்வா எடிசன் மின்சாரம் மூலம் விளக்குகளை எரிய வைக்க முடியும் எனச் சொன்ன போது அவரைப் போல விஞ்ஞானிகளாய் இருந்தவர்கள் சொன்ன முதல் வார்த்தை சாத்தியமே இல்லை. முடியவே முடியாது என்பது தான்! அதற்கு அவர்கள் பட்டியலிட்டக் காரணங்களைப் பாருங்கள்.

  • ·          மின்சாரத்தை ஓரிடத்தில் இருந்து இன்னொரு இடத்திற்குக் கடத்த முடியாது.
  • ·          அப்படியே கடத்தினாலும் அதைப் பயன்படுத்தும் அளவைக் கணக்கிட முடியாது.
  • ·          அப்படியே கணக்கிட்டாலும் மின்சாரப் பயன்பாட்டிற்கான செலவு அதிகம்.

மின்சாரம் கண்டுபிடிக்க முயன்று கொண்டிருக்கும் ஒருவருக்கு இந்தக் காரணங்களைக் கேட்டால் அவர்கள் சொல்வது சரி என்பது போலவே தோன்றும். சராசரி மனநிலை கொண்டவர்களாக இருந்தால் அப்படியே ஏற்றுக் கொண்டு ஒரு வேலை சாத்தியமில்லையோ? என நினைத்துத் தன் முயற்சியில் இருந்து பின் வாங்கி இருப்பார்கள். ஆனால் எடிசன் அந்த ரகத்தைச் சேர்ந்தவர் இல்லை என்பதால் ”அப்படியே” எனச் சொல்லப்பட்ட அத்தனைத் தடைகளையும் தகர்க்கச் சாத்தியமிருக்கிறதா? என யோசித்தார். சுமார் நாற்பதாயிரத்துக்கும் மேற்பட்ட தன் குறிப்புகளோடு இராப்பகலாக ஆய்வுகளை மேற்கொண்டார். தன் முயற்சியில் ஜெயித்தார். தன் கண்டுபிடிப்புகளின் மூலமாக நியூயார்க் நகரை மின்சார விளக்குகளால் ஒளிர விட்டார். அப்போது எதிர்மறைக் கருத்துகளைச் சொன்னவர்களும், முடியாது என வாதிட்ட சக விஞ்ஞானிகளும் அசந்து போய் பாராட்டுவதற்காக அவரைத் தேடி வந்தனர். தாமஸ் ஆல்வா எடிசன் அளவுக்கு நாம் உழைக்க வேண்டியதில்லை. உங்களின் முயற்சியில் அதீத ஈடுபாடும், நம்பிக்கையும் கொண்டு அதற்காகத் தீவிரமாக உழையுங்கள். அதனால் ஒரு வேளை தோல்வி அடைந்தாலும் அந்தத் தோல்வி கூட வெற்றியாகவே கருதப்படும் என்பதே அவரின் முயற்சி நமக்குச் சொல்லும் பாடம்.

முடியாது என்று முடிவு செய்வதை விட முயற்சித்துப் பார்ப்பது மேல் இல்லையா? ஒரு காலத்தில் விவசாயம் செய்ய வேண்டுமானால் நிலம் இருக்க வேண்டும் என நினைத்துக் கொண்டிருந்தோம். நிலத்தைத் தவிர வேறு எங்கும் பயிரிடுதல் சாத்தியமில்லை என்பதே நம் மனநிலையாக இருந்தது. இந்த மனநிலையை உடைக்க எத்தனித்த முயற்சி வீட்டு மாடிகளிலும் தோட்டம் வளர்க்கும் சாத்தியத்தை உருவாக்கியது. அதன் தொடர் முயற்சி பலவிதமான மாற்றங்களைக் கொண்டு வந்தது. அப்பொழுதும் முடியாது - இயலாது என்று சொல்லிக் கொள்ளும் மனநிலையில் இருந்தவர்கள் மொட்டை மாடியில் அதிகத் தொட்டிகளை ஏற்றினால் கட்டிடத்திற்குப் பாதிப்பு வரும் என்றனர். மாடித் தோட்டங்கள் அத்தனை சாத்தியமில்லை எனச் சும்மா இருந்தனர். அவர்கள் சொல்வதும் ஒரு வகையில் சரி தானே என்ற நினைப்பு தொட்டிக்குப் பதிலாக சாக்குப்பை, எடை குறைந்த பிளாஸ்டிக் வாளிகளில் வளர்க்கலாம் என்ற ஒரு தீர்வைக் கொண்டு வந்தது. அப்போதும் கூட அவர்கள் முடியாது என்று சொல்லிக் கொண்டிருப்பதை விடவில்லை.

செடிகள் வளர்ப்பிற்கு மண்ணைப் பயன்படுத்துவதால் அப்படிச் செய்தாலும் எடை குறைவதெற்கெல்லாம் வாய்ப்பில்லை என்று வாதிட்டனர், அதற்கும் ஒரு தீர்வு இருக்கும் என்ற எண்ணம் தந்த தேடல்கள் மண்ணுக்கு மாற்றாக தேங்காய் நார்களைப் பயன்படுத்தும் சாத்தியங்களைக் கொண்டு வந்தது. இன்று எல்லா வீடுகளிலும் மொட்டை மாடிக் காய்கறித் தோட்டங்கள் உருவாக ஆரம்பித்து விட்டன. கட்டிடங்களைக் கட்டி விற்கும் நிறுவனங்கள் கூட சிறப்புச் சலுகையாக மொட்டை மாடித் தோட்டங்களையும், வீட்டுத் தோட்டங்களையும் அமைத்துச் சில மாதங்களுக்குப் பராமரிப்பும் செய்து தருகின்றன. வீட்டு மாடியில் ஒரு காய்கறித் தோட்டம் அமைக்க முடியும் என்று சொன்னதற்கே இத்தனை எதிர்மறைக் கருத்துகளைத் தாண்ட வேண்டி இருக்கிறதென்றால்  மின்சாரத்தைக் கண்டறிந்து உலகம் முழுக்கத் தர நினைத்த எடிசன் எத்தனை எதிர்மறைக் கருத்துகளைத் தாண்டி வந்திருக்க வேண்டியிருந்திருக்கும் என்பதை எண்ணிப் பாருங்கள். உங்களைச் சுற்றி இருப்பவர்களிடமிருந்து மட்டுமல்ல உங்களுக்குள் இருந்தும் வரும் எதிர்மறைக் கருத்துகளைத் தாண்டினால் மட்டுமே உங்களால் உங்கள் இலக்கைச் சென்றடைய முடியும்.

அதேநேரம், இலக்கு நோக்கிய முயற்சிகளில் உங்களின் பலம், பலவீனங்களையும் மனதில் கொள்ள வேண்டும். வீம்புக்காக எதையும் செய்து பார்க்கும்  முயற்சிகள் எந்த பலனையும் தராது. மாறாக அதனால் காலவிரயமே ஏற்படும். அதன் வெளிப்பாடு முடிவுகள் நினைத்த படி இல்லாது போகும் போது ஒருவித விரக்தி மனப்பான்மை ஏற்பட்டுத் தொடர் இயக்கம் தடைபட்டுப் போகும். உங்களுக்குள் உருவாகும் இந்த எண்ணம் வெளியில் இருந்து நீங்கள் பெறும் எதிர்மறை எண்னங்களை விடவும் அதிக ஆபத்தானவை. எனவே மிகச்ச் சரியான வழிமுறைகளில் உஙகள் இலக்கை முடியாது என்ற நிலையில் இருந்து முடியும் என்ற நிலைக்கு மாற்றுங்கள். அது உங்களையும் ஒரு வெற்றியாளராக மாற்றும்.
 
நன்றி : அச்சாரம் மாத இதழ்